==== حاتتعلم حاتموت ====
============

قالوا زمان التعليم بالمجان ، مش عايزين امية فى البلاد .
وصل الكتاب الجامعي ل 100 و200 قلنا ماشي
التعليم واجب وشئ مقدس وضرورة مفهاش كلام .
طيب ..!
قالوا التعليم بالمجان .
قلنا جميل وخصوصاً لطلبة الاعدادي والثانوي
ولم نكن نعلم ان المدارس اصبحت دور للدعاية عن الدروس الخصوصية
وياويل الطالب الذي يعترض على عرض أستاذه لينضم لدرسه
قلنا مابيد الحيلة .. الطالب لازم يذاكر وينجح عشان دة ثانوية
عايزين كلية محترمه .
مافيش مشكلة ندفع الكم سنة دول وبعدها نرتاح
ويالها من راحة ..طبعاً عارفين شكل الراحة ايه ..؟؟

***
طيب ذل للناس واخرب بيوتهم
فلوس عالدروس رايحة وجاية
وتعب وزهق وقلق ليل ويا نهار
وذاكر يابني ، ذاكري يابنتي
الامتحانات عالابواب
ويذاكر الولد وتذاكر البنت
.........................
وآتى يوم الانطحانات ( على رأي اخونا جمعاوي الروش )
غش وتسريب للاسئلة
وطبعاً انت من سنة بتذاكر في كم كتاب يعني حافظ المنهج
طيب عشان كدة الاسئلة حاتيجي على قدك وفي مستواك وانت قدها وقدود
حل ياشاطر حلي ياشاطرة ...؟؟؟
ايه ..!! صعب الامتحان ..؟؟
طب يمكن هي المادة دة بس
حل ياشاطر حلي ياشاطرة
ايه .. صعب تاني الامتحان .. اكيد العيب فيكم .. خايفين ولا ايه ..؟؟
.....................
طيب كان نفسه في طب ، نفسها صيدلة
ماله الصحي ومالها التمريض ..

ابكي وعيط ..دموع ودم .
معاش ياولدي .. مش بايدي الى كان
كان نفسي افرحك وحققلك امانيك
بس يظهر ان الريس ووزيره عندهم رأي تاني
اكيد ادرى مني ومنك ..
.....................
حلو الحبل شكله عاجبني
بينادي عليا بيقول علقني
علقته .. دخل فى رقبتي
طلعت فوق....نزلت لتحت
أنا فين دلوقت
انا فين دلوقت
قهرة ام ...ودمعة اب

وده مصيرك ياشعب ياساكت ياكاتم غيظك وخايف
وبكرة حكاية جديدة
عشان عارفك بتحب تسمع ومبتتكلمش

من الجاني ؟ من عنده الحق ؟
من الجاني من عنده الحق ؟

======

ودة جزء من الى حصل ...
أمي أنا هاشيل الرياضة.. التفاضل والتكامل كان صعب.. والمراقبين قالوا لنا.. انتوا فقراء والامتحان اتسرب في المنيا علشان عندهم فلوس».. هذه آخر كلمات قالها طالب الثانوية العامة، حسن محمد يسري «١٦ سنة» لوالدته، ثم خرجت الأم من المنزل وعادت لتجد ابنها قد صنع «مشنقة» لنفسه في باب الغرفة، وتخلص من حياته..

والقصة التانية ..
وفي بورسعيد، انتحرت الطالبة ميرهان هاني سالم «١٨ سنة» قبل امتحان الميكانيكا، .مما أدي إلي توترها قبل امتحان الديناميكا والاستاتيكا، فألقت بنفسها من شرفة الدور السادس، في الساعات الأولي من صباح أمس، ولفظت أنفاسها الأخيرة أثناء محاولة إسعافها وإنقاذها داخل المستشفي،

دة كان تعليق بسيط للخبر الذي قرأته اليوم في جريدة المصري اليوم
انتحار لطالب بعد امتحان الديناميكا
وطالبة تلقي بنفسها من البلاكون
وكان هناك تعليق لاحد القراء يقول "نطالب بكفن لكل طالب"
وكفى به تعليق .
وحسبنا الله ونعم الوكيل ..